Denìla nø nøngmaq dvcicerì tékà a:lì we Putao móng wál dvpvt gvza dvkàng we rvtø ie. Mòngzøl dø a:li rvgaq ínì gø (2021) nøng kení KIA ri nvng angmaq í shø:lò dvmlvng mvdo ri Putao lvp kaq vnvp mvnshi rvt móng garshú rií nø vgám dvzaqshi we íe. 2023 nøng kení Myitkyina-Sumbrabum-Putao nvmdøng tvra taq angmaq zvngshi ráì yvng kení Putao lvp à:lì ri kadvng te vl dvsha we gø shvngbeí sháie.
Denøng (2025) nøng zànggá í nø Putao lvp kaq ma-tuq mv-daq wa nø Langse tvra, Krvngkú tvrà, Nkàgá tvra nvng Sumbriyang tvrari kení vsvng dvtøngshì nø dvkángshìwe shvngkàri táshì, dvjarì yvng shie. Angmaq tuq rvgaq ídvngte taq vsvngshì we, mvringrì, wamàrì vcat nø móngzøngcèrì nø dvshápaqhøt vhø:mò we wa yvngshìe. Nøngmaq rvgaq taq yadø íwe mà-hømlvm dvpvt, cìlmvzàn dvbu:ngòwe KIA nvng angmaqí shølòwe mvdòrì kaq ma-toi; móng mòngzøllvm rvt gar dvzaqshìwe mvdòrì kaq wa vtoìe, nònggwøn zíìe, wa nø móngzøngcerìò nøntwvt kùngrì nø: Konglvngpø yvng (4.10.2025) ni, Putao yvng (7.10.2025) niní taq waò we íe.
Yalòng kaq, “Móngcèrì yadø vhaqshì rvt KIA rì nvng tiqdø wáshì mvdòrì nø Putao lap gòng nø cilmvzàn dvbu:ngò we íe,” wa nø dvhúòwe kàrì, vruòwe kàrurì nø angjøng dìng we mø- í. Angmaq yadø gònglvm dvzaqshì we nø nøng vrvm íe. Denøng nø móngshøl shaqré rvcvngkùng (Election) gø wàlvm rvtø níshì raì rvt, welòng wá mv-bønlvm nvng rvgaqwàng gø tøl lúnlvm dvpvt téwa shvnvngshìwe mvng íe!
Putao mong wál kaq cìlmvzàn wá dángí rvgaqwàng tøllvm nø angmaqò tōni mvnggá í rvt nøng vrvm shvnvngshì we íe. Angmaq gònglvm dvnshì rvtø taq móngzøngcerìí ma-toì, wa vhaq vdū bøi lòng kaq, “Móngcerì vhaqshì rvt KIA rì nvng angmaqí shø:lòrì góng vdūe,” walòng nø dvpèò we wa íe. Yamvtú móngzøng dvcìcerìí shvngwa shálvm rvt dvtà:nì we íe. Tiqdvtvng gø pøna laqlú:nì, waì nø vlømshaì lòng shá dvzá:rìe.
Rvwang Kàru nvng Tónglaqyà Mvdò
Putao
