Putao , Nvmjøng(1)
Rvwang Dvcì nv̀ng Móng bvnlì angpvnpvn taq dvzaqshì ya:ngì we Móngdu Gamzaq ဝဏ္ဏကျော်ထင် Pongzi Pong nø (1975) nǿng taq Yesu vdòng yøp ya:ngì. We rvtø taq Gatuq Mvrìng shvnvng dvgvmgong taq kǿmya:ngà. Mèpvng nø Nvmbøngshø taprà cíl lúngà rvt dvgá tiqzang kaq vcílo nø kǿm ya:ngà.
Yakvt nø Vdè Dvcì Kulwang gø vlá:mì, vrá to kǿm ya:ngà zang gø Nvmbøngshø taprà cíl lv́m wáng vdòng vbá lv́m íá:mì rvt vdè Dvcì muqhǿm Kulwang kaq svng vcílshì long nø vdue, wa nø dvcì cèrì ngø̀m we Lìpong taq gø nønt vrá we vlbǿì.
Wervt nø Dvgvm angshá kèní angshv́rkaq Vcíl we bvnlì nø 2025 nǿng Nvmjøng (1) ni (Zølni ) taq wáshìe. Vsháng 6:00 AM kèní 7:30 AM rvtø nø Dvgvm vjáng nø ngv̀mrì rvkulwe wà dá:ngí Dvcì Kulwang kaq Modoí toòe. We dá:ngí (8:00 AM kèní 9:00 AM ) vdòng nø Dvgvm angshv́r yvng Mongkàciq rø we, angmvshǿl angdong rø we, Gvray kaq Shvgun Zaywa wawe Lìpong wádá:ngí vjúrøtno nø Dvgvm angshv́r vdòng zá:ngòe. Kø nø Tvnøn angchø̄m chuq dá:ngí wum nv̀ng tvpwa rvmølshaq vdòng ngv̀m we sharørì zángòe. Kø mvdvmtaq kèní Rvwang Mvdoshvmí møqòe.
Dvgvm angshv́r taq Pongzirvp cèrì , Dvcì Pølá Mvdòrì, Mvgam Redvm Dvng rvp, Vlu zv́ng dvzaqshìrì, Myanmar Móng Rvwang Kàru nv̀ng Tónglaqya Mvdò, Rvwang Vlangré Mvdò nv̀ng Konglvngpǿ Pyithuzit( Tanē)mvdòrìò Mvrøt Nvmbvn Kwvngrì gø tuq nø ta:moe. We lìpong taq Putao nv̀ng Mvjvngboq Gwørwangrì kèní Pongzírvp cèrì , Shvngø̀mré vrvm kèní Shvngøntshú Svrarì , Bvnlìzǿm|roqshúrì , Rvwang Kàru nv̀ng Tónglaqya bvnlì wáshú shaqrérì, Rvwang Vlangré Shølshúrì nv̀ng Mvrìng vrvm kèní nønttǿng shaqrérì mvme gø kø̀:me.
Dvgvm vcíl bvnlì dvpvt Mvgam Redvm Dvng maqrvp nv̀ng Dvcì tubum pølá Mvdò, Dvcì shóngnønt kèní vlu zvngshì we vlu gvmsungí wáshì we sháshìe. Zvndvtut gø Dvgvm angshv́r zang kaq gonglv́m tvrà dvcøp we , Chøm angshv́r dvpvt Chøm wàlv́m bvnlìrì zvndvtut vlwe gø sháshìe.
RSM Media
